អាជ្ញាធរសុំការយោគយល់ពីពលរដ្ឋខណៈនឹងមានការផ្អាកចរាចរណ៍ ២ថ្ងៃចាប់ពីស្តុបជលផល ដល់ស្ពានអាកាសក្បាលថ្នល់
ភ្នំពេញ៖ គណៈកម្មាធិការកណ្តាលគណបក្សប្រជាជនកម្ពុជា នឹងរៀបចំប្រារព្ធធ្វើមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នៅវិមាន៧មករា ស្ថិតក្នុងសង្កាត់ទន្លេបាសាក់ ខណ្ឌចំការមនរាជធានីភ្នំពេញ ហើយនឹងមានការផ្អាកចរាចរណ៍យានយន្តគ្រប់ប្រភេទ លើកំណាត់មហាវិថីព្រះនរោត្តមរយៈពេល២ថ្ងៃ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី២៤ ខែមករា ឆ្នាំ២០២៣ បានឱ្យដឹងថា ថ្ងៃទី២៨ និងថ្ងៃទី២៩ ខែមករា ឆ្នាំ២០២៣ វេលាម៉ោង០៧:០០នាទីព្រឹក រដ្ឋបាលរាជធានីភ្នំពេញ នឹងធ្វើការបញ្ចៀសចរាចរចំពោះយានយន្តគ្រប់ប្រភេទ លើកំណាត់មហាវិថីព្រះនរោត្តម ចាប់ពីស្តុបជលផល ដល់ស្ពានអាកាសក្បាលថ្នល់ និងបរិវេណជុំវិញទីតាំងប្រារព្ធពិធីរហូតដល់បញ្ចប់។
រដ្ឋបាលរាជធានីភ្នំពេញ អំពាវនាវដល់ប្រជាពលរដ្ឋទាំងអស់ យោគយល់ អធ្យាស្រ័យ និងបញ្ចៀសការធ្វើដំណើរឆ្លងកាត់កំណាត់ផ្លូវខាងលើ តាមកាលបរិច្ឆេទ ហើយផុតរយៈពេលហាមឃាត់បណ្តោះអាសន្ននេះ អាជ្ញាធរនឹងបើកឱ្យធ្វើចរាចរជាធម្មតាវិញ៕